(ខេត្តរតនគិរី)៖ នៅព្រឹកថ្ងៃទី១០ ខែសីហា ឆ្នាំ២០២៦នេះ ឯកឧត្តម ញែ៉ម សំអឿន អភិបាល នៃគណៈអភិបាលខេត្តរតនគិរី និងឯកឧត្តមអភិបាលរងខេត្ត លោកអភិបាលក្រុងបានលុង និងប្រធានមន្ទីរពាក់ព័ន្ធមួយចំនួន បានអញ្ជើញចូលរួមក្នុងពិធីបើកកញ្ចប់វិញ្ញាសា ប្រឡងសញ្ញាបត្រមធ្យមសិក្សាទុតិយភូមិ សម័យប្រឡងថ្ងៃទី១០-១១ខែសីហា ឆ្នាំ២០២៦ នៅមណ្ឌលប្រឡងវិទ្យាល័យសម្តេចឪ-សម្តេចម៉ែ ក្រុងបានលុង។
លោក ខាត់ សាម៉ាល់ ប្រធានមន្ទីរអប់រំយុវជន និងកីឡា ខេត្តរតនគិរី បានអោយដឹងថាដំណើរការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់ខេត្តរតនគិរី សម័យប្រឡង២០២៦នេះ មានបេក្ខជនសរុបចំនួន ១៩៧៧នាក់ ស្រី ១០៨៦នាក់ (ក្នុងនោះជនជាតិដើមភាគតិច ស្មើ ៤៤.៩៩ភាគរយ ស្រី៤៤.០១ភាគរយ រួមមានគ្រឹង ២២៥នាក់ ស្រី១២៩នាក់ ទំពួន ៣២៩នាក់ ស្រី ១៧៤នាក់ ព្រៅ ៧២នាក់ ស្រី៤០នាក់ ចារ៉ាយ ១៨១នាក់ ស្រី ១០៣នាក់ កាចក់ ៣៤នាក់ ស្រី១១នាក់ កាវ៉ែត ៤១នាក់ ស្រី ១៥នាក់ ព្នង២នាក់ ស្រី ១នាក់ ជនជាតិលុន ៦នាក់ ស្រី ៥នាក់ សរុបចំនួន ៨៩០នាក់ ស្រី ៤៧៨នាក់។ ចែកចេញចំនួន ៣មណ្ឌលប្រឡង សរុប៨០បន្ទប់ ក្នុងនោះ មណ្ឌលវិទ្យាល័យ សម្ដេចឪ សម្ដេចម៉ែ ៤០បន្ទប់។ ប៉េក្ខជន មកពីវិទ្យាល័យចំនួន១៦ ក្នុងនោះវិទ្យាល័យរដ្ឋចំនួន១២ និងវិទ្យាល័យឯកជន៤។
មណ្ឌលវិទ្យាល័យ ហ៊ុន សែន ភូមិថ្មី មាន ២៨បនទប់ បេក្ខជនសរុប ៦៩០នាក់ ស្រី ៤៤៧នាក់ មកពីវិទ្យាល័យចំនួន ១៩ ក្នុងនោះវិទ្យាល័យរដ្ឋចំនួន១២ វិទ្យាល័យឯកជនចំនួន៤ និងបេក្ខជនថ្នាក់បំពេញវជ្ជា បេក្ខជនស្វៃរិនចំណេះទូទៅ និងបេក្ខជនស្វៃរិនបំពេញវិជ្ជា។
មណ្ឌលអនុវិទ្យាល័យ ប៊ូ ថង ទេសអន្លុង មាន១២បន្ទប់ មានបេក្ខជនសរុប ២៨៧នាក់ ស្រី ១៤៩នាក់ មកពីវិទ្យាល័យចំនួន១១ ក្នុងនោះ វិទ្យាល័យឯកជនចំនួន៣ និងវិទ្យាល័យរដ្ឋចំនួន៨។
ក្នុងការអញ្ជើញបើកវិញ្ញាសាប្រឡងនោះ ឯកឧត្តម ញ៉ែម សំអឿន បានលើកទឹកចិត្តដល់ក្មួយៗ ដែលជាបេក្ខជន បេក្ខនារីទាំងអស់ ត្រូវខិតខំធ្វើឱ្យអស់លទ្ធភាព និងចូលរួមថែទាំសុខភាពឱ្យបានល្អ សម្រាកឱ្យបានគ្រប់គ្រាន់ និងជូនពរប្រឡងជាប់និទ្ទេសល្អៗទាំងអស់គ្នា។ ឯកឧត្តម បានបន្ថែមថា ការប្រឡងឆ្នាំនេះគឺក្រសួងអប់រំ យុវជន និងកីឡា បានធ្វើការរឹតបន្តឹងដល់បេក្ខជន បេក្ខនារី ដើម្បីធ្វើយ៉ាងណាឱ្យវិស័យអប់រំនៅកម្ពុជា មានគុណភាព មានន័យថា អ្នកចេះ គឺជាប់។
សូមបញ្ជាក់ថា ជាពិសេសមានគ្រូអនុរក្ស ចាំឆែកឆេរលើដងខ្លួនបេក្ខជនប្រឡង មុននឹងអោយចូលក្នុងបន្ទប់ប្រឡង សំដៅធានាថាបេក្ខជន បេក្ខនារីទាំងអស់ មិនមានឱកាសបានយកសំណៅឯកសារ ព្រីយ៉ុង ឬម៉ាស៊ីនគិតលេខ ទូរស័ព្ទ ចូលក្នុងបន្ទប់ប្រឡងបានដាច់ខាត។ដោយឡែកនៅក្រៅបរិវេណមណ្ឌលប្រឡងគេឃើញមានក្រុមស.ស.យ.ក ខេត្ត បានជួយរៀបចំកន្លែងផ្ញើរម៉ូតូដោយមិនគិតថ្លៃ និងមានកងកម្លាំងនគរបាល អាវុធហត្ថ សម្រួលចរាចរណ៍ ការពារសន្តិសុខ យ៉ាងម៉ឺងម៉ាត់ និងក្រុមគ្រូពេទ្យ ក៏មានវត្តមាន នៅមណ្ឌលប្រឡងទាំងបីនោះថែមទៀតផង៕ ដោយ ភួង ផុន
